Oonko sinula saamen tahi kväänin taustaa? Haluatko sie kirjoittaa? Sillon debytanttiprogrami oon justhiin sinua varten!

Debytanttiprogramissa 2027 seuraama kolmea nuorta skribenttiä läpi vuoen samala ko het kirjoittavat seenile tarkoitetun käsikirjoituksen. Debytanttiprogrami oon tänä vuona Unge Viken Teaterin, Kvääniteatterin, Åarjelhsaemien Teateren, Beaivváš Sámi Našunálateáhterin ja Talent Norgen välinen yhtheistyö.

Kieli

Sie voit kirjoittaat saameksi, kvääniksi, norjaksi tahi eri kielitten yhistelmänä. Sovitamma tiimin jokhaista dramatikkaria varten ja käänämä tekstit matkan varrela.

Mikä teksti oon?

Saamen ja kväänin teatterissa erilaiset kynstiliset ilmaisut voivat sekoittuut toinen toisheen. Teksti voi kans syntyä joijun ja joikutekstin tahi käsityön kautta. Riippumatta siitä minkä muuon valittet, tullee tekstin olla esitettävissä.

Faakilinen sisältö

Unge Viken Teater oon triivanu Debytanttiprogramia vuuesta 2020 ja UNG TEKSTiä vuuesta 2016 saakka. Kvääniteatterin, Åarjelhsaemien Teateren og Beaivváš Sámi Našunálateáhterin yhtheistyön kautta haluama nyt syventyä teemoihin niin ko joijun dramaturgia, saamen/kväänin teatterimetodikka ja saamen ja kväänin teatterin ja tekstin holistikka. Met työtelemmä praktisesti institusuunitten näyttelijöitten, kääntäjitten ja muitten seenikynstneritten kans. Jokhainen debytantti saa erityistä seurantaa yheltä näiltä saamen/kväänin teatterilta.

Osalistujat saavat kans pääsyn Talent Norgen tarjousportfolihoon.

Mitä sie saat Debytanttiprogrami 2027 osalistujanna?

• kuukausittaisia roikkakokkouksia pääasiallisesti Unge Viken Teaterissa Lillestrømissä
• matkoja Kvääniteatterin (Raisi), Åarjelhsaemien Teateren (Mo i Rana) ja Beaivváš Sámi Našunálateáhterin (Koutokeino) järjestämhiin työpajoihin.
• työpajoja saamen ja kväänin teatterista ja seenikynstistä
• dramatyrgin individuellista seurantaa
• toimihaaran menttori
• tekstityöpaja näyttelijöitten kans
• toimihaaran kokkouksia
• sinun valmis teos lujethaan Debutantslippissa joulukuussa
• sinun teos oon maholista vyrtteerata esitettäväksi Unge Viken Teaterissa, Kvääniteatterissa, Åarjelhsaemien Teateressa og Beaivváš Sámi Našunálateáhterissa.

Programi kestää januaarikuusta joulukuuhun. Osalistujitten tullee löyttää aikkaa sekä obligatoorisile kokkoontumisille ette omale kirjoittamiselle. Suurin osa programisisälöstä vaatii fyysistä osalistumista, mutta jokku asiat (niin ko kokkoukset sinun dramaturgin kans) voi suorittaa digitaalisesti.

Kuka voi hakea ja miten hajet?

Debytanttiprogrami oon sinule, joka haluaa satsata ammatilliseksi. Sinula ei tarvitte olla kirjoituskoulutusta, mutta olis hyvä, ette sinula oon jo ennesthään vähän kirjoituskokemusta, seenitekstistä tahi muista stiilistä.

Ikäraja: 16 – 30 vuotta.
Programi oon ilmainen.
Osalistujat oon itte vasthuussa omista matkakuluista Lillestrømin kokkoukshiin.
Opintomatkat Sapmhiin oon katettu.

Ko hajet, sinun tullee esittää idea käsikirjoitusta varten. Sinun prosektilla voi olla saamen tahi kväänin tematikki, mutta se ei ole välttämätöntä.

Hakemuksen tullee sisälttää:

• 1 sivun pituinen CV (sie voit nouattaa tätä formaattia: https://skuespillersenter.no/cv-mal/)
• Käsikirjoituksen, teeman karakteerisisälön ja seenisisälön prosektikuvvaus. Korkeinthaan 2 sivua.
• Värkin seenit/haamustukset. Korkeinthaan 4 sivua.
• Motivasuunipreivi, korkeinthaan puoli sivua.
• Jos kirjoitat muila formaatila ko kirjoitetula tekstilä (niin ko joijula, käsityölä tahi suulisella muistelukynstilä), oon kans maholista liittää ylimääräinen fiili, joka tuo tämän framile kuvan, äänen tahi videon avula.

Kuka lukkee sinun hakemuksen?

Hakemuksia vyrtteeraa jury johon kuuluu:

• Sarakka Gaup, dramaturgi ja Debytanttiprogrami 2027 saamen konsulentti
• Kristin Solberg, Åarhjelsaemien Teateren teatterijohtaja
• Per Ananiassen, teatterijohtaja / Rawda Carita Eira, Beaivváš Sámi Našunálateáhterin konstittueerattu teatterijohtaja
• Frank Jørstad, Kvääniteatterin teatterijohtaja
• Hilde Levin, Unge Viken Teaterin dramaturgi
• Øystein Ulsberg Brager, Unge Viken Teaterin dramaturgi ja UNG TEKSTIN prosektijohtaja
• Kari Ramnefjell, Unge Viken Teaterin teatterijohtaja

Debytanttiprogrami 2027 päivämääriä

Kokkouksitten ja työpajoitten päivämääriä ei ole vielä päätetty. Nettisivua ylösdateerathaan jatkuvasti.

Hakuaika: 1. syyskuuta 2026.

Hakijat saavat vastauksen joulukuun alussa.

HAKIJASKEEMA

Maholiset kysymykset voihaan lähättää sarakka@ungeviken.no tahi oystein@ungeviken.no.

Met ootama innola sinun hakemusta!